قالت الصورة : مقاطع شعرية عندما تتكلم العدسة - وسوم عبدالله السالم : مدونة شخصية قطرية ثقافية

قالت الصورة

قالت الصورة

(1) قالت الصورة :
قالت الصورة

أحسن طريقة تحكم الأوباش

تلبس كذا: نظارة النجم البطولية

وتمشى الهوينى ماسك الرشاش

ومشعلٍ خلفك حريقة.

. . . . . . . . . . . . . . . . . . . . . . . . . . . . . . . .

(2) قالت الصورة :

قالت الصورة خلك كلب

لا تحسب إني قاسية

لا تظن مالي قلب

تعرف ثقافتنا مع الحيوان،

ياخي عدّ نفسك كلب.

. . . . . . . . . . . . . . . . . . . . . . . . . . . . . . . . . . . . . .

 (3) قالت الصورة :

قالت الصورة

خلاص يكفي ..

ما بقى في صدري الضيق تحمل للإهانة

أما انزل الرشاش عن وجهي الأبي

ولا فخلّص يا غبي

واطلق رصاصتك الجبانة .

. . . . . . . . . . . . . . . . . . . . . . . . . . . . . . . . . . . . . . . . . . . .

(4) وقالت:

قالت الصورة جندي أمريكي يبكي

يا ربي وش هالمنطق المقلوب

ليه آلطّخ الروح النقية

وش ذنب هذا الأعزل المستضعف المرعوب

قدام خشم البندقية ؟

 كيف انسجم مع داخلي/ الإنسان

وانا اعيث في الأرض الفساد

واقتل أخي الإنسان .

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

(5) وقالت:

فتاة بدوية في الصحراء

ياربي هالأرض “ضاقت” بي هموم وجراح
وانتا خلقت السما وش ” وسع” بيبانها

لو أني آصف يدّيني وينبت جناح
واطير واترك لكم هالأرض واحزانها

. . . . . . . . . . . . . . . . . . . . . . . . . . . . . . . . . . . . . . .

(6) وقالت:

اسمي عيد

بعييييد ..

خلوني هلي خلف الجبال اللي تشوف هنااااااااااك

من عمري ثلاث سنين ما اعرف غير لسعة عمتي

وابوي ما شفته ، يقال أنه توفي من زمان بعيد

بعيد ..

ما جربت لعبة غير هالتجوال ادور عن هلي

ما عشت في عمري ولا فرحة إلى هالحين واسمي عيد

. . . . . . . . . . . . . . . . . . . . . . . . . . . . . . . . . . . . . . . . . .

(7) وقالت الصورة:

ضوء في خندق

مشكور ..

لو شباكك الحي اختنقت بظلمتي في الخندق المغمور

الروح هذا الخندق المظلم

وذكرى الغايبين النور

. . . . . . . . . . . . . . . . . . . . . . . . . . . . . . . . . . . . . . . . . . . .

(8) وقالت:

الضرب بالودع قالت الصورة

لحظة ..

يقول الودع عنك ، شي ما ينقال .

تدري وش المكتوب فوق الشال ؟

لحظة شوي شوي ..

يقول اول شي :

تبغي لك مره من دونها رجال

ويقول ثاني شي :

شما ميتة بس انت قلبك حي

ويقول .. اصبر هالحروف مبعثرة

 اقووووووول :

بسك ثرثرة يا فاجرة ، تقرين حزني في العيون ويعني انك قارئة فنجال !

د. عبدالله السالم
د. عبدالله السالم
شاعر ناقد مدون من قطر

2 تعليقات

  1. يقول نواف المري:

    قارئة الفنجال ؟

    أيتها اللعينه :(

    فعلا ولو صدقو !

  2. يقول نااااس:

    مريت هنا

    لليلتي هذي

اترك لي أثرك