العشق التجاري : مقاطع شعرية الشاعر القطري عبدالله السالم - مدونة وسوم

قلق

العشق التجاري

كسابقتها، موجهة لعضو اسمه: قلق في إحدى المنتديات الإلكترونية الأدبية.

[ قلق ]
هذا القلق زور ولا دور معتاد
ولا تخيّرت حكم الاغلبية

جيت اتبع اثاركم واصيد وانصاد
كسروا رماحي مع شداد المطية

علقة خطاويك ماهي علقة اجواد
ما خذت من خطوتك غير الخطية

والحين هذا انا
في الوادي المهجور
الروح عش طيور
والقلب عود القنا
متوحد ومكسور

هذا القلق زور ولا جور واجهاد
ولا الذمم في ضواحينا ردية

كم لي وانا ادمدم اخطائي ولا فاد
واروح وانقض قراراتي الغبية

قلق تبي تنفش امواسك على الضاد
لا والله اما ذي
اعذرني
.
.
.
قوية .

………………….

[ حصاد اليوم ]
دقوا الباب / ادخلوا

مستعجلين

لوثوا صوتي، يدي، حتى مسامي

رحت ادور في رصيدي عن بقايا أكسجين

– مرحبا
– خير ؟ اشبعد ؟
– وشفيك ؟ ناولني سيجارة

واجلست وحدة هناك ومدت يدين الوصال حبال

اتذكر اني ملت عن سرج السحاب

ومال ..

والثانية تضحك وبعد شوي :

كيف الحال ؟
– حالة عدوك ، كيف تغلبني “مره” سهلة وانا “رجال” !

والثالثة تضحك وبعد شوي :

تردفني على سرج السحاب

تهز ركاضة عطشها، تفتق الجلباب

اتذكر ان الرمح يطعن برتقالة من شباب
وذاب ..

وكيف ما اقلق يا قلق

واكتب واجاري

مختنق من خلقتي بالعشق الاول
وازكمتني ريحة العهر النبيل
ونكهة العشق التجاري

د. عبدالله السالم
د. عبدالله السالم
شاعر ناقد مدون من قطر

اترك لي أثرك