قصيدة بخير جعلك طيب وجعلك بخير، قصيدة الشاعر القطري عبدالله السالم - مدونة وسوم

بخير

قصيدة بخير

 

قصيدة بخير جعلك طيب وجعلك بخير

مرتاح وعلومي تسرك، مليحة

يمكن كذا محتاج لشوي تغيير

أو كنبَات البيت ما هي مريحة

وشوي يرهقني السهر والتفاكير

واستفتح الدنيا بروحٍ جريحة

وشوي متورط بكثر المخاسير

في عز ما الدنيا يديها شحيحة

أحيان لو ينصون بيتي مسايير

ما عندي اللي يشتري لي ذبيحة

والعسر يا ابن العم أبشرك تكفير

حتى نموت أرواحنا مستريحة

لولا العسر ضاعت علينا المعايير

بين القلوب الطيبة والقبيحة

كم صاحبٍ تشريه حمر الدنانير

ما تشبع أذنك من روايع مديحه

لكن ليا صكت عليك المقادير

يطلع من المتردية والنطيحة

وبخير جعلك طيب وجعلك بخير

مرتاح وعلومي تسرك، مليحة

يمكن شوي أقشر وحظي معيثير

أركض عمر واقدام وقتي كسيحة

والسفر موجعني وكثر المشاوير

ومخالَط العالم شريحة شريحة

تعبت راح العمر كله وأنا أسير

وأخاف عاده فـ اخر السير طيحة

تضحك بها بعض الوجيه المكاشير

اللي يسمّون التشفي نصيحة

وابشرك طيب ومرتاح وبخير

أما فضيحة؟ موت ما به فضيحة

قصيدة بخير
29/3/2007
15:41
طبربور

د. عبدالله السالم
د. عبدالله السالم
شاعر ناقد مدون من قطر

اترك لي أثرك