عقدة حجاجي

عقدة حجاجي
عقدة حجاجي

ما تشبع من السؤال وكثر تكراره

عن ضيقي المستديم و عقدة حجاجي

وين ابتهج واتعدى الضيق واسواره

إلا أنت عطني سبب يستدعي إبهاجي

عندي من الضيق ما يستعصي إضماره

لو تكتمه بسمتي يحتد في اوداجي

ينتابني الحب وانا الحاقد الكاره

ويحيط بي الخوف وانا المؤمن الراجي

خايف ومرتاب كني ف أول الغارة

والناس تقتل وراي ووحدي الناجي

عايش على اعصابي أخفي الضيق وآثاره

كني انتظر شي ياتي عجل ومفاجي

آزجّ (نفسي) بتأويلات محتارة

وأرمي على (الآخر) إشكالية إخراجي

لو شفت لي طفل يلعب ف آخر الحارة

يدور في بالي إنه يقصد إزعاجي

هذي السكينة مجرد معطف فارِه

تخفي ضياعي وفقر ايديّ واحراجي

بيني وبين الشغب شباك وستارة

لو هبت الريح عرت خافي أدراجي

وتجي وتطرح سؤال كثر تكراره

لا بالله إلا باضيق وباعقد حجاجي

18 / أبريل / 2004
طبربور

عبدالله السالم
عبدالله السالم
شاعر ناقد مدون من قطر

اترك لي أثرك