شي تافه : قصيدة نبطية عمودية، الشاعر القطري عبدالله السالم - مدونة وسوم

شي تافه

شي تافه

لا تحسف ما على مثلي حسافة

خلك أكبر من جنوني وهذياني

كنت سر وتم في يديك اكتشافه

وجه بارد لا يحس ولا يعاني

كل ما قلته عن أوجاعي خرافة

طوّفه، مثل الكلام بلا معاني

كنت أورّدك الظما من دون رافة

وكنت أزيّف بالشعور، وكنت أناني

وكنت .. وش باقي بعد يحتاج إضافة؟

المهم أنك تسلمني عناني

وش بقى بي ترغبه ولا تخافه

ما كفاك من العذاب اللي كفاني؟

ليه تشغل خاطرك في شي تافه

ليه تسبل دمعك العذري عشاني

عدّني مثل أي غلطة وانحرافة

وانسني .. وارقد قرير العين هاني

اختر الدرب الطويل بلا انعطافة

لين تخفيك الشوارع والمباني

لك عليّ اعرض لك البسمة لطافة

وآحبس لك دمعتي واعقد لساني

لا تردد بين وقفة وانصرافة

خذ طريقك وارتحل.. ولاّ ثواني:

يا حياتي قبل تاخذك المسافة

خلني اشبع من عيونك في مكاني

الدوحة
2002

 

د. عبدالله السالم
د. عبدالله السالم
شاعر ناقد مدون من قطر

اترك لي أثرك