الموعد القادم

الموعد القادم

وترحل ..

واطفي شموع المكان

لموعدٍ قادم

يا ابن آدم

تراني مثلك ابن آدم

يهلهلني الجفا ويلمني التصميم

وترحل ..

واحفظ انفاسك بذرات الهوا

واخلي آثارك، بقايا ضحكتك، عطر الحديث، وكل شي بموقعه

واخلّد الذكرى على اخر مشهدٍ كنا

واغطي الطاولة

واوقف العقرب على الساعة ثمان إلا ربع

واثبت التقويم

وترحل ..

تترك العالم معلق في رجا باكر

تنازعني الظنون

وأجترح صبر على قدي

انحي العابرين

وتكثر يدين تدق الباب وتعدي

وانا المرهون بين العجز والتسليم

وترحل ..

ما ابتسم هالباب

غير لنفحة المسجد

وعطر الغيمة اللي غافلتني من زوايا الباب

بس

وطاري الغيّاب

ملل، حتى المكان اللي نذر نفسه

ليوم الموعد القادم

تعب وانسل من نفسه

نفض بعض الغبار اللي على الجدران

شرّع لليدين اللي تدق الباب وتعدي مصاريع الهوى

واستغفر اركانه عن النكران

ذبح من سلة اخلاصه حمامة

وارسل القربان

لروح الموعد القادم

نزف بعضه وهو نادم

على خطيئة الترميم  .

طبربور

12/6/2004

عبدالله السالم
عبدالله السالم
شاعر ناقد مدون من قطر

اترك لي أثرك