منفى - كرسي ودفاية : شعر تفعيلة، الشاعر القطري عبدالله السالم - مدونة وسوم

منفى

منفى كرسي ودفاية

1-

كرسي ودفاية

وملابسٍ متناثرة

ودولاب مقلوبٍ على راسه

معاليقه شتات

واكياس أصلاً ما لها داعي

وكوم أوراق مرمية حوالي الباب

يمكن يوم جيت أقطها

ما فيه سلة مهملات

2-

ياربي

ليه آحس ضايق بي محلي

وآحس فيه اشباح تطلع لي شوي وتختفي

متى يطل الصبح والمذن ينادي للفلاح

ابي اغسل ذنوبي

واصلي

وانطفي

3-

البرد يسري في عظامي

يمكن الشباك ما اتسكر عدل

أقول : الشرهة على اللي غشني

سـمّاك : دفاية

باقي شوي وأحضنك

والبرد يسري في عظامي

أقول : الله يلعنك !

4- لا وعد

لا صوت أحبه

لا بلاد ..

لا طيف شما

لو يجي لحظة ينور لي ظلامي

خذلني مثل الآخرين

ما غير البرد يسري في عظامي

ولا شريط الأسبرين

5-

هذا الغريب

بردان طول الوقت ما يدفى

وغريب طول الوقت

حتى غرفته منفى !

3/3/2002
عمّان

د. عبدالله السالم
د. عبدالله السالم
شاعر ناقد مدون من قطر

اترك لي أثرك